دير فِيها لربّي ولاّ للنّاس ؟؟

السّلام عليكُم يا نآس اللّمة الغاليين ،
إن شاء الله رآكُم لاباس ؟ المُهم مانطوّلش عليكم ،
كيما معروف أنّو كامل النّاس يحبّو يتبادلو أخبارهم و أجمل الذكريات في حياتهم بين بعضهم البعض ، و ابسط وسيلة باه تحتفظ بذكرياتك هي التصاور ،
بصح تصوّر في الدّار معليش في الجنان معليش في البحر معليش في راس الجبل ولا فوق سطح القمر معليش ، بصح تصوّر ونتا تحجّ؟؟ [ندعوك للتسجيل في المنتدى أو التعريف بنفسك لمعاينة هذه الصورة] هادي ما حبتش تدخلي لراسي ، مافهمتش نتا راك تطوف وتقول " لبيّك اللهم لبيّك " وفي نفس الوقت تتبسم مع الهاتف وتصوّر ؟؟
أنا مافهمتش توصل لمكان مقدّس وأرض طاهرة كيما هاديك وين تشمّ فيها ريحة الرّسول عليه الصلّاة والسّلام وريحة الصّحابة والأنبياء الطّاهرين ، من المفروض دموعك يوليو شلال وتنسى الدّنيا ومافيها وتولي تشوف غير الآخرة بين عينيك ماشي تصوّر روحك باه كي تروّح تحطّها في الفايس بوك وتجمع عليها أكبر عدد من الإعجابات [ندعوك للتسجيل في المنتدى أو التعريف بنفسك لمعاينة هذه الصورة] ، أنا نشفى ناس بكري لما يكون رايح للحجّ يطلب السّماح و يفرغ قلبو كامل من حبّ الدّنيا ، بصح درك راهو قريب يدي معاه الإذاعة تصورو وهو راهو يطوف ، سبحان الله العظيم معليش إذا حاب تحكم ذكريات على هاداك المكان الطاهر خلي لما تخلّص العبادة و صوّر ، ماشي نتا تعبد في ربّي وراك تقوم بركن من أركان الإسلام لي مايقدر يوصلّو إلاّ من استطاع إليه سبيلا وفي نفس الوقت تفكّر كي تروّح للدار واش رايح يدير بالتصاور، ما فهمتش إذا يحجّو لربّي ولا للنّاس؟؟
وكاين حاجة شفتها اليوم الصّباح وحيّرتني " واحد يصوّر روحو وهو يصلّي في التراويح؟؟ [ندعوك للتسجيل في المنتدى أو التعريف بنفسك لمعاينة هذه الصورة] " ، درك هادا يا إما خلصو عليه البلايص وين يتصوّر ( يعني تصوّر في كامل مناطق العالم وقال خلي نكمّل الألبوم تاعي بزوج تصاور في المسجد ) و يا إما راهو ينعت للناس بلي راهو مومن وراهو يروح يصلي التراويح ، درك هادا يدير فيها مزية؟؟ ( مافهمتش بالاك لي يروح يصلي التراويح يذبحوه وما يزيدش يولي للدار على هادي الناس ولات تصور روحها وتنعت شجاعتها كي راهي تروح تصلي ) ، كلي راهم يثبتو في التديّن تاعهم للناس ، كاين عباد مايصليوش التراويح بصح في الليل بينهم وبين ربي يقعدو يبكيو باه ربي يهديهم للطريق المستقيم ، الأعمال راهي بالنيات وتكون بينك وبين مولاك ماشي قدام الناس .
سبحان الله درك ولا لي يروح يتصدّق يسمّع الناس كامل وقريب يجيب الصحافة تصورو وهو يمد في الدراهم ، و لي يعاون عبد قريب ينشرها في الأخبار ، وين رانا رايحين؟ إذا حاب دير حاجة ديرها لوجه الله ما شي للناس ،
أنا نعرف عائلة عندهم تقريبا 10 سنوات ولا بالاك كتر ما علاباليش ، المهم لمدة كل هذه السنوات وكل عيد أضحى يلحقهم كبش للدار وباطل يعني حتى النقل تاعو وباطل وللدرك مازالو ما عرفوش هاد الشخص لي راهو يفرحهم كل عام ، هادي هيا الناس لي تحب دير الخير ولي تحب تربح أجر عند ربي ماشي شهرة عند الناس،
المهم واش نقولكم اسمحولي طولت عليكم بصح دوخني الموضوع هادا وحبيت نشارك بيه ناس اللمة ونتوما قولولي لاكان راني غالطة ، وفي اللخر نقولو ربي يهدينا وربي يثبتنا ويخلي كل أعمالنا تكون لوجه الله ماشي لوجه النّاس ، وصح فطوركم وربي يتقبل منا ومنكم

سلام

يوما بعد يوم تتوضح وتتجلى لنا مواهبك وإبداعك والفكر الراقي الذي تحمله.
اسمح لي اخي العزيز.......ان أرفع القبعة احتراما
وتقديرا لك على ماتحمله من فكر نير ومعرفة ثاقبة
بارك الله فيك
محبتي وتقديري لك..

» الصديق...موقف ولاّ عشرة