بسم الله الرحمن الرحيم
..
"مدري من وين ابدا.. مشاعر واحاسيس مختلطة.. لكن كل اللي اعرفه ان انا اليوم غير عن انا قبل خمس سنوات!
مدري وين بداية قصتي ومدري وين نهايتها.. انا قبل خمس سنوات كنت ميت لا مشاعر ولا احاسيس ولا حياة..
وبحكي لكم حكايتي ووش اللي صار لي قبل خمس سنوات....
"
"نزلت مع ولد عمي لمدينة جدة لأن هم قاعدين يبنون بيت جديد ونزلنا ناخذ اغراض من هناك وعلى اساس ان سفرتنا بتقعد شهر او اكثر .. يومها كنت على علاقة مع وحدة وكنت موهمها اني احبها وانا والله العب عليها..
في ذيك الليلة كلمتني وقلت لها خلاص انا رجال ماقدر استمر معك والله ان دموعها ماهزت فيني شعرة.. لكن يشهد الله مافكرت ااذيها او اسوي لها شي يضرها وانا تركتها عشان ماتتعلق فيني اكثر كنت احس بضيقة ومقدر انام وانا افكر اني قاعد العب عليها "
انا ماكان لي علاقة ببنات غيرها.. كانت هي اول بنت واخر بنت بالذات اني كنت احب بنت عمتي وناوي اتزوجها.. يمكن حبي لبنت عمتي هو اللي خلاني اترك هالبنت.. من بعدها قررت ماعاد اتعرف على بنات والعب عليهم ابد..
انا كنت محافظ على الصلاة بالرغم من اني كنت ااخرها احياناً لكني ماكنت اتركها.. وادخن بعد "
"وفي يوم من الايام ونحنا في جدة والله اني ما انساه ماحييت.. جاني ولد عمي اللي مخاويني قال لي قم نرجع قلت ليش قال اخوي خطوبته بآكر ولازم ارجع..
قلت له تم نتوكل على الله بعد صلاة المغرب وفعلاً كملنا اشغالنا والمغرب مشينا على ديرتنا "
ونحنا في الطريق قمت اقول ياخي وراه محمد ماخطب الا وحنا مسافرين ؟قال ولد عمي ايه عشان عمتك توها واصلة.. قلت انا وش دخلها عمتي في خطوبة محمد ؟قال مو بنت عمتك
/مها/ هي العروس!!!!
انا تجمدت اطرافي يوم ان سمعت اسم مها ماقدرت اتحكم في السيارة وحاصت بنا بس سلمنا.. مافكرت في شي ولا حسيت بشي ما اتذكر الا ان بغى دمي يتفجر من عروقي.."
"ولد عمي قال لي وشبك يارجال قلت له ابد بس جتني دوخة يمكن لاني تعبت اليوم.. واستلم هو مكان السايق وانا ركبت في مكانه.. والله اننا تصلنا لديرتنا وانا مدري متى وكيف وشلون عقلي مو معي ابد.. خلاص مها راحت من يدي ليش انا ماقلت لامي تخطبها من اول ليش.. وكلام واسئلة كثيرة دارت في راسي لكن الوقت مايسمح لي اتكلم.. خلاص انا اللي ضيعتها.. وصلت لأهلي حسوا اني موب طبيعي.. قلت اني تعبت من الطريق وعلمتهم عن الحادث كود يسكتون عني "
"ماحضرت الخطوبة ولا الملكة ولا الزواج.. بعدها بفترة تعبت وماعدت اتحمل ابد ورحت لأصحابي بالاستراحة وقلت لأهلي اني مسافر ومطول.. وهم صدقوني..
كنت احاول اشغل نفسي باي شي عشان انسى مها هي الحين مرة لولد عمي وما يجوز افكر فيها.. بعدها تذكرت دموع البنت اللي تركتها وقلت في نفسي يمكن هذي ثمرة لدعوة دعتها علي!!
استغفرت ربي ونمت... "
"وبيوم من الايام وانا بالاستراحة جاني صاحبي قال والله ان هنا بنت ودي اجيب راسها.. يقصد في البيبي.. انا قلت له فكنا من علوم الرخوم وخلي بنات خلق الله.. وانا والله مانسيت ذيك البنت وكنت على طول اقول اكيد اللي صار بسبب دعاها علي..
قال صاحبي والله ما اخليها لين اجيب راسها.. "
"وكل يوم وهو يحاول يتودد لها وهي ساحبة عليه وبعدها حذفته وهو انجن.. جاني قال والله لو تجيب راسها ان لك 5000 ريال!!
بس رقمها ولك اللي تبي.. انا نطت في راسي الفكرة وقلت له تم.. وعطاني بنها وحاولت اتودد لها وحذفتني.. البنت ثقيلة دم ومانزلت لي من زور بس خلاص قلت والله لاعلمها ان الله حق وما اخليها في حالها"
ورحت شريت جهاز جديد لأنها ماكانت تقبل اضافتي.. واضفتها من البن الجديد بإسم بنت.. وكنت اتكلم معها على اساس اني بنت وكل يوم اتكلم معها وكل ما ارسلت شي رحت اعلق عليه.. وهي اكثر الاحيان غصب ترد علي.. وانا صامل على وضعي.. ارسل وارسل لين ترد.."
"صارت عادي معي وصارت احيان هي ترسل لي قبل ما ارسل لها.. تغير اسلوبها وصارت تتكلم معي براحة وتسأل عني وتقول لي اني صرت /قريبة/ منها.. وانا مبسوط والله كنت انبسط لاني صرت قريب منها مو لاني ابي اجيب راسها!!
اصلا نسيت خطتنا انا وصديقي وصرت بس ابي اقضي وقتي معها واقوي علاقتي فيها ولو كانت هالعلاقة مبنية على الكذب والخداع "
"مها؟؟ نسيتها وماعاد لها في قلبي شي.. صارت هالبنت ماخذة تفكيري كله.. جلسنا 9شهور مع بعض وكل يوم علاقتنا تصير اقوى وانا حبيتها حب يشهد الله نساني كل شي.. وقررت اصارحها اني ولد.. واعلمها بكل شي.. وان رضت رضت وان تركتني فانا استاهل اللي يصير لي "
" بيوم من الايام وانا قلبي والله بيخرج من صدري قلت لها انا بقول لك شي وتكفين افهميني.. وعلمتها بكل شي بالتفصيل وكتبت لها يا بنت الناس انا حبيتك صدق والدليل اني علمتك بكل شي لاني ما ارضى اني ابقى معك بالكذب.. هي ماردت علي وماحذفتني!!
مرت ثلاث ايام تقريبا وهي مختفية عن البيبي بس كان عزائي الوحيد انها ماحذفتني يعني فيه امل انها تسامحني وتستمر معي.."
"بعد الثلاث ايام دخلت للبيبي لكنها ما ارسلت لي شي.. ورحت لها انا وارسلت لها وماردت.. قلت خلاص مالي الا ارضيها لاني والله ماقدرت اجلس يوم زيادة من دونها.. رحت لها وقلت يابنت الناس انا ابيك لي بالحلال.. وماردت.. وبعدها ارسلت لي اعتقد ذاك اليوم دقيت براسي في السقف من قوة النقزة اللي نقزتها من الفرحة "
"ووافقت تستمر معي بشرط اني اثبت لها حسن نيتي.. انا قضيت معها فترة طويلة وهي كانت تتكلم معي بعفوية.. عرفت اخلاقها وشخصيتها زين.. وماندمت ع الخطوة اللي قررت اخطيها.. قررت اكلم امي عن الموضوع واعلمها اني ابي ارتبط ببنت احبها.. لكن اذا سألتني من وين اعرفها وش بقول!!
هذا الشي كان مصعب علي الموضوع كثير "
"بعد سالفة مها اهملت دراستي وصلاتي ونزل وزني 13 كيلو في اقل من شهر.. وبعد ماعرفت هالبنت تغيرت كثير حتى اني تركت الدخان عشان ربي ثم عشانها.. وفي يوم قررت اعلم امي..
رحت لها يمه ابي اخطب!!
قالت خلاص ياوليدي بنت خالك مالك غيرها قلت لا يمه اللي ابي اخطبها وحدة مانعرفها وانا احبها وعلمتها اني عرفتها من البيبي.. وانتوا تخيلوا امي وش قالت!!! "
"امي سبتها وشتمتها وقالت والله ماتدخل بيتنا بمت شوارع مثلها.. قلبي يتقطع وانا اسمع كلام امي.. لا يمه والله هي مو كذا.. وامي تسب وتشتم وتدعي عليها وارتفع صوتها لدرجة كانت بتضربني.. انا طلعت من البيت ورحت للاستراحة وقفلت جوالي.. اسبوعين ومحد يعرف عني شي.. اهلي يدورون علي مثل المجانين ولا يعرفون عني شي.. "
" ولد عمي علمهم بمكاني وجاني اخوي ورجعني معه بالغصب.. امي شافتني وقامت تحضني وتسلم علي ياوليدي لاتعيدها لاتعيدها.. قلت لها وافقي ولا والله لاروح وماعاد تلاقوني قالت طيب لكن والله انها اذا ماعجبتني هي او اهلها انك ماتحلم فيها.. قلت طيب"
" رحت ارسلت لحبيبتي وعلمتها ان امي وافقت وطلبتها عنوان بيتهم.. وبعدها باسبوعين سافرنا لهم.. لان البنت ساكنة بمدينة غير مدينتي..
عايلتهم ماعليها كلام والبنت بعد مؤدبة وعجبت امي.. طلبنا يد البنت وقالوا بنفكر ونرد لكم خبر.."
" جتنا الموافقة.. وجاء اليوم اللي بشوفها فيه ومقدر اوصف لكم احساسي وقتها!!
اليوم بشوف اللي حبيتها ونستني كل همي بشوفها وبالحلال.. والحمد لله تمت خطوبتنا ع خير.. وراح اعقد عليها بعد ما اتخرج السنة الجاية باذن الله.. وهذي هي قصتي..
القصة واحداثها اكثر من اني اقدر اوصفها لكم لكن اتمنى اني وصفت لكم ولو جزء بسيط من تجربتي.. وعشان احمد الله ع نعمته اللي انعمها علي..وعشان اعلمكم ان الله بيعوضنا بشي ماكنا نتخيله انه موجود.."
" ادعوا لي بالتوفيق والسعادة وان الله يجمهنا على خير.. اما بالنسبة لصاحبي فهو ما يدري ان البنت اللي اخترتها زوجة لي هو كان له يد في اني الاقيها.. واعتذر على الاطالة.. لكن اقسم لكم بالله ان هذي قصتي حقيقية ويمكن تكون جزء بسيط من قصص كثير محد يعرف عنها شي..
وصل الله وبارك على سيدنا محمد !
الرئيسية 
