ثَقآفةُ الرِّفقِ بالحيوآن

موضوع: ثَقآفةُ الرِّفقِ بالحيوآن 11/8/2015, 10:24 am

السّلآم عليكم يا نــآس لمتي المحترمين والغاليين
وأسعد الله أوقــآتكُــم

من دُون أيّ مقدّمات ندخل في الموضوع مباشرة وراهو معروف من العُنوان وهو:
ثَـــقافة الرّفــق بالحــيوآن

[ندعوك للتسجيل في المنتدى أو التعريف بنفسك لمعاينة هذه الصورة]

لأنّو هاد الثّقافة راهي منعدمة في بلادنا , في بالهم الحيوان مداير للضرب والتعذيب برك
ونساو الحديث الشريف لي يقول " ارْحَمُوا مَنْ فِي الأَرْضِ يَرْحَمْكُمْ مَنْ فِي السَّمَاءِ"
يحوّسُوا يرحمهُم ربّي وهوما يآذيو في هاد المخلوقات البريئة
ما طلقو لا قط ولا كلب حاشاكم ولا طير قريب الشجر ويعذبوهم
مثلا قبل يومين برك حكاتلي أحد القريبات بلي في طريقها شافت عصفور صغير طاح من الشجرة ما جات تعاونو تلقى الولاد هربو بيه ورايحين يذبحوه,درك هادو بشر؟؟
مرة شفت في مواقع التواصل الإجتماعي مجموعة من الشباب ذبجو قطة وقطعولها راسها
ونشرو صورها في النت, كي شفتها قريب تقييت حاشاكم المورال فسدلي, كن صبت
ذبحتهم واحد بواحد ونشرت صورهم بالمثل باه هكا نتهنا , حسبي الله ونعم الوكيل فيهم
علاه تعذبو فيهم هكا, لي يحرقوه لي يقطعولو رجليه لي يذبحوه ولا كي عادو ما يهدروش؟
ولا كي راهم بلا عقل زعما ؟؟, أصلا حاشاهم هوما لي بالعقل خاطي حنا
كن تروح تشوف الأجانب يخلي ولدو في عمرو 3 سنين مع حيوان في الدار , وكي يجي
يلقى ولدو كيما راه وشعرة ما نقصت منو , بصح جرب خليه مع عبد وحدو وشوف واش يصرا لا ما لقيتوش هرب بيه لبلاد خلاف وباعلو الأعضاء تاعو
سبحان الله ما تقول رانا مثقفين, وكي تحكيلهم على الأجانب و معاملتهم مع الحيوان, يوليو
أئمة ويقولك راهم كفار ويدخلو الكلاب حاشاكم للديار ويربيوهم وحنا ما نقدروش خاطر مسلمين , سبحان الله علاه حنا طلبنا منك تربيهم وتدخلهم للدار؟ ولا طلبنا منك تبنيلهم قصر ؟
صار المعاملة وما منعوش منك حتى نروحو لتربية الحيوان, أصلا ولادهم وما قدروش يربيوهم حتى يربيو الحيوان ( حاشا لي ما يستاهلش)
والله حرام في حرام , و أصلا حنا فكرة العنف ضد الحيوان تبدا عندنا من الصغر
تلقى أب يمشي مع إبنو وفجأة يلقاو قطة في الطريق, هاداك الأب ماشي يقول لإبنو
هاك اعطيها تاكل ولا امسحلها على راسها باه تحس بالعطف تاعك, لالا هو يقولو هاهي
قطة اضربها برجلك ولا ابزق عليها ( حاشاكم) درك هادو عباد ؟؟
ما يمنع منهم والو حتى كباش العيد , تلقاهم يتسابقو بيهم يشاركو بيهم في المعارك
يولي هاداك الكبش يتعذب إما يتجرحو رجليه ولا راسو , وبلا حكاية الذبح لي يجمعوهم

ويذبحوهم قدام بعضاهم وهوما يشوفو, والله حرام
أنا راني درك كبيرة ومانحملش نشوف قدامي كبش يتذبح , علابالي حاجة تاع ربي
بصح الله غالب يغيضني بصفتو كائن حي, لدرجة الصباح تاع عيد الأضحى نكون في أسوء حالاتي
أصلا في هاد الدنيا كاين زوج مخلوقات ما نقدرش ومستحيل نآذيهم و نكره لي ياذيهم بعد
هوما الأطفال والحيوانات , لأنو لي يقدر يسبب الأذى لهاد الكائنات البريئة راهو يسبب الضعف من الأذى للناس.
أنا نشفى عليها مرة كنت نقرا في السنة الثالثة ثانوي وكنا يوم الثلاثاء مانروحوش للدار بسبب الوقت القصير, مالا نخرجو للساحة وكل شخص يجبد ياكل واش عندو, وكنت كل مرة تجيني قطة وتقعد قدامي نولي نقسم ماكلتي معاها وإذا ما كفاتش والله العظيم نخرج من الليسي لمدة 5 دقائق هكاك نروح نشريلها حاجة ونقدمهالها وبقيت هكا حتى ديت الباك, ساعات لما نلقى حلزونات برا يخرجو بسبب الأمطار نولي نهزهم من الأرض ونحطهم في مكان آمن باه واحد ما يعفسهم , لما نشوف قطة قاطعة الطريق ما نتحركش حتى نطمن بلي قطعت بأمان
هكا يتهنا خاطري, علابالي هاد الحوايج درتهم لربي وماشي باه ننشرهم قدام الناس وماكنتش حابة نذكرهم اصلا بصح باه نبين برك بلي العطف على الحيوان ما يحتاج لا جهد كبير ولا كنوز العالم , مبادرة ولا خطوة صغيرة قادر ترحم بيها هاد المخلوقات
أنا نعرف وحايد من العائلة عندهم قطة كل ما تولد يهزو ولادها هكاك ويرميوهم برا
درك هادو عباد؟؟؟ صغار ما زالو حتى ما حلوش عينيهم تبعدهم على أمهم؟؟
قادر يموتو من البرد ولا ياكلوهم حيوانات أخرى , والله حرااااام ومنكر كبير

اسمحولي طولت عليكم ولكن هادي رسالة نقول فيها للناس باه يبركاو من أذية هاد المخلوقات , قادر قطرة ماء توضعها لطير ولا كلب عطشان تدخلك للجنة
ارحموا هاد الحيوانات , ولا بعبارة اخرة بعدو عليهم وخليوهم يعيشو حياتهم
وإذا راني غالطة في كلامي والله مستعدة نسمع منكم أصلا هنا مكان للتشاور
وما تنساوش الرفق بالحيوانات وصى عليه ربي والرسول عليه الصلاة والسّلام
اتهلاو في رواحكم
ســـلآم

طرح مكتمل بجميع جوانبه جعل اقلامنا
تقف عاجزة عن الاضافة
بارك الله فيك على هذا الموضوع المفيد والنافع
كل الشكر والتقدير