السّلام عليكم يا أهل لمتّي الأكارم والأفاضل
ان شاء الله راكم لاباس؟؟
المهم ندخل في الموضوع مباشرة ولي نظن راهو واضح من عنوانو
المهم كيما نعرفو بلي رانا في فصل الصيف
هاد الفصل لي نسميه فصل العطل والرآحة ولا نسميه فصل الفسق والفضائح؟
لأنو الرحمة في الشتاء تلقى البرد والتلج وكل واحد حاكم دارو واللبسة مستورة خوفا من البرد
يعني رحمة ربي, بصح مع يدخل فصل الصيف يبدا اللبس الفاضح
ما تمنع لا في سوق ولا في بحر ولا في أي مكان
المهم نغلقو موضوع اللبس الفاضح في الصيف
ونوليو لموضوعنا ولي هو سهرات الفسق واللهو
هاد السهرات لي راهي تتصرف عليها الملايين والمليارات زعما بحجة الترفيه عن المواطن المغبون
أصلا ما ترفه ما تفرح تزيد المرض والغمة
يجيبلك فنان معرف منين جا زعما جزائري وهو لا اصل ولا أخلاق ولا تربية
صورة مشوهة للفن ولأصول الفن تلقاه يسوطي فوق المسرح و هو يغني في هاداك الغنا الباهي الله يبارك
لي نصو في الشرق ونصو في الغرب ويكملك باقي الأغنية غير موسيقى ودربوكة
وإلا زعما باه يبينو تطور الجزائر ثقافيا يولي يجيبلك فنان أجنبي أو فنانة أجنبية
ويقلبلك القناة الجزائرية لقناة أجنبية بهاديك اللبسة المحتشمة الله يبارك
وبلا الكلمات الفاضحة لي ما تقدرش تسمعها بينك وبين روحك
يعني مهما تغمض عينيك تدي ذنب على ودنيك ههه
ومن بعد يقولك الثقافة الجزائرية
ما شاء الله على هاد الثقافة لي نصها فسق وفضائح وعرا ( حاشاكم )
بصح في هاد الهدرة كاملة لي هدرتها كاينة حاجة لي تقلقني وتهبلني
هي المواطن الجزائري نفسو
رغم كامل واش ذكرت بصح تلقاه تما مربع
ولي يزيد يحيرني لما نشوف عائلات جاو يتفرجو في هاداك الفن الراقي ما شاء الله
ما فهمتش إذا راح الحيا لهاد الدرجة؟
ما فهمتش كيفاه تقدر تقعد مع باباك ولا يماك ولا مع ولادك وتتفرج في هاديك اللبسة
وتسمع في هاداك الكلام
وزيد فوق هادا تلقاه يشطح وفرحان بروحو
زعما خلصو عليهم الأعراس؟؟ سبحان الله العظيم
كاين لي تلقاه كي تقابلو الكاميرا يخبي وجهو,اصلا علاه تجي ومن بعد تولي تخبي في وجهك ؟
وكاين لي يشوف الكاميرا يزيد يتفرعن ويبدا ينعت في روحو
شعب ما تلقى ما تهدر عليه , والله نحير في الناس لي تجي تضيع وقتها وصلاتها في بلايص كيما هكا, إذا حاب تحوس بعايلتك وتنحيلهم على بالهم في هاد الفصل كاين بزااف مناطق في الجزائر الله يبارك يهبلو, منها يتعرفو على مناطق بلادهم ومنها تنحي تعب العمل وتستمتع بالعطلة تاعك
خير من الشطيح والرديح والفسق الكبير لي راهو صاير تما
والله راني حايرة في الوالدين تاع درك ولا في الرجال تاع درك كيفاه يخمو؟
و كيفاه يدي عايلتو لمكان كيما هكا, هادا إذا ماراحتش مرتو وحدها وهو قاعد في الدار
و حاشا حاشا لي مايستاهلش مع احترامي للجميع
درك قولولي يا خاوتي راني غالطة؟؟
وفي بالكم هادو أماكن وين تقدر تتجمع فيهم العائلة؟
وزعما ماكانش غير هاد السهرات باه يرفه المواطن الجزائري على نفسو ويزها؟
راني نستنا في ردودكم القيمة وربي يحفظك جميعا ويستر عليكم وعلى عايلتكم
تحياتي الخالصة للجميع
ســــلام
الرئيسية 
