انشالله تكونو قادرين على شقاكم في دياركم برك ..ومانلقاش كانش ناس عايشين حياتكم في بلاصتكم...
زعمة تلقى جارك يعرف اسرار دارك خير منك عادي عادي.....
انا الحق جيت نفهم راسي تبلوكا ...زعمة كاين ناس تخمم في بلاصتي؟ ممكن ممكن كلشي عادي في بلادي
...
الحق اليوم راسي وجعني من التخمام ...ايا قلت علاه مانستشيركمش خير عارفتكم رزان وربي يبارك..."واللي ماشي رزينة. المهم تسلك راسها في الكوزينة”...
علبالكم كنت نخمم نبدل خدمتي مي قبل لازم نبدل ديبلومي ...باسكو مكتوب فيه ” ليسانس لغة عربية وآدابها”
مي قالولي بليه واشربي ماه؟؟ زعمة واش لازم يتبدل فيه؟؟ وي وي علابالي ” مازوت الدارجة ومشتقاتها ”؟؟
زعمة خاوتي ” ليصانص ارخس ولا المازوت”؟؟...
ياسيدي فكونا من ديبلوم العذاب ...كنت ندرّس في مدرسة قرآنية نتاع محو الامية ولا واش يعيطولها ؟تلفتلي...
قالولي هذا العام غفلوها... بايكو...علابالكم ولا والو؟...هذي ياسيدي نورية ربي يطول في عمرها ويقصر في قعدتها على الكرسي قالتلنا راكم تنفخو في قربة مقطوعة....وعيطتلي البارح” في المنام” قالتلي بدلي لافوا ديالك يا واحد المتخلفة...
وقولي : عَمِّميها تخف يا بنت بلادي..خلي العطشان يشرب من شارع البؤساء...؟زعمة واش نفسر هذالمنام؟؟
خممت نجيب طفل نحفظو الستين حزب باسكو انا راسي حابس الله غالب ماحفظتش كامل...ايا لقيت قانون العرض والطلب يقول
حفظيه” الستة وستين تبلعيطة وفوقهم تبهديلة”....
واقيلا عييتو خاوتي؟؟ ايا اسمحولي ماني نشرب في قهوة ولا أتاي لعشية علابيها راهي مخلطة عليا مي ماقلوليش واش نخدم؟. ماتقولوليش اقعدي في الدار برك. باسكو نتعب بالخف من تقرعيج نساء الحومة. وقنواتالجزيرة
حتى خممت نولي مذيعة لقيت الحاجة خدوج جارتنا تتقنها خير مني و” بالدارجة” يا محاينك.....
المهم انشالله فهمتو التخلاط والتجلاط نتاع خيتكم ذنسيت نقلكم علبالكم باللي الشي اللي ماقدرش يديرو الجار”الاستعمار” قادر يديرو ولد الدار” بنات وولاد بلادي”؟؟
ويبدا من محو معالم القومية والهوية الوطنية الى تعاليم الدين الاسلامي...
هكا باه نتجردو من. ثوبنا العربي والاسلامي على صحيح..
حقا قولولي واش بقى في لبلاد؟ الريح الريـــــــــــــح...
حسبي الله ونعم الوكيل...
مش انوضو نغسلو وجوهنا باه نفطنو لبلادنا واحوالنا خير؟؟
الرئيسية 
